• الرئيسية
• قضية راي عام TV

ظهر البلوجر حمدي عاشور في فيديو علي صفحته الشخصية ينتقد حملة الهجوم الاخيرة

وننشر لكم نص الحديث

حجب مواقع حمدي عاشور وبرامج وقنوات بتحاول تكلمني عشان اوضح فيها تفاصيل حوارات وقصص بدل ما يكلموني عن شغلي واللي قدمته. فانا عامل الفيديو ده ردا على قلة الأدب والإهانة ولكل شخص كان بيحاول يشوه صورتي ويسيء ليا. انا شاب عندي 24 سنة قدرت الحمدلله بمجهود شخصي اعمل أعمال درامية بشهادة الجمهور في مسلسلات بتصرف عليها مليارات معملتش زيها. اتكلمت فيها عن الواقع والشارع وناقشت قضايا كتير مهمة زي أزمة الدروس الخصوصية والضغط اللي بيحصل على الأهل، زي فساد منظومة الكورة في الناشئين، والظلم اللي بيحصل بسبب الواسطة. اتكلمت عن قضية الهجرة غير الشرعية واتكلمت عن أهمية التجنيد وحب الوطن والدفاع عنه. اتكلمت عن فساد بعض نواب مجلس الشعب اللي مبيعملوش اي حاجة لدائرتهم. اتكلمت عن أزمة الإسكان وغلاء الأسعار واستغلال التجار وحجب السلع. اتكلمت عن حرب الجيل الرابع والخامس وعن الذباب الإلكتروني اللي بيحاول يوقع ما بين الشعب المصري والسعودي. حاربت اللجان إلكترونية بطولي خارجية في فيلم أحلام على الوعي، فمتجيش تختصر المجهود كله في تصريح قلته في 10 ثواني أو في محتوى سابق قدمته زمان واعتذرت عنه وصححت مساري. دا لما بتكلم على المحتوى ده أو بتكلم عن التجربة دي فبتكلم عنها عشان أنصح الشباب اللي جاي من بعدي إنها ما تقعش في نفس الخطأ بتاعي. لأنه طبيعي جدا أي شاب وهو عنده 19 سنة أو 17 سنة ما يبقاش في حد بيوجهه أو يكون مشتت في وقت ما فيعمل محتوى يعني مش أصح حاجة. فأنا بقول تجربتي عشان أوعي اللي جاي من بعدي.

برغم إن نفس الماضي بتاعي والله العظيم كان في تكريمي في مهرجان القاهرة السينمائي، كان في مسلسل طبيبة شرعية، كان في أفلام عملتها من 2017 بس تقريبا إحنا مش عايزين ناخد بالنا غير من حاجة واحدة بس. أنا بصراحة متفاجئ ويعني ومصدوم لأن أنا كلامي كان واضح جدا مع السيد الوزير في حواري معاه وقلت أنا مش بعمم، سمعتوهاش بتنادوا بالأمانة وبحرية الرأي. وأنتوا بتجتزؤوا كلامي يعني حاجة بصراحة أنا كنت بيتفاجئ والله العظيم. وانا لما بتكلم عن سلوك سيء موجود من البعض فده بهدف الإصلاح منه فده بهدف ان احنا نعالجه. ولا المهنة دي ملائكية ولا حاجة ما طبيعي جدا كل حاجة في الحياة فيها الصالح والطالح. فانا معرفش ليه اتخدت بهذا الشكل. عموما يعني أنا أخدت الإجراءات القانونية ضد كل من شهر بيا وأساء لي. ودي حاجة أنا مش هتراجع عنها.

أما بالنسبة للأخت اللي بتقول أصل ما بيضحكش فأنا فعلا مش جاي أضحك الناس أنا جاي أوعيه. واللي بتقول أصل ما عندوش الموهبة وما بيعرفش يمثل فهل ده معناه إن دكتور أشرف ذكي بمعهد فنون مسرحية بكل أساتذته ودكاترته اللي اختبروني وقبلوني وادوني الكارنيه ده؟ وبقيت ممثل أنتمي إلى مهنة التمثيل وإلى نقابة المهن التمثيلية والدولة معترفة بيا كممثل والجمهور شايفني كده. كل الناس دي مابتفهمش يعني. الأخ اللي بيقول أصل بحس ممثل من الستينات فده على فكرة شرف كبير لي على فكرة، لأن الستينات دي كان فيها عمالقة الفن، كان فيها فن بيأثر وبيشكل وجدان الناس، وارجع وشوف النوع ده لما كان بيتقدم من الفن زمان، كان تأثيره على شكلنا ولغتنا وسلوكياتنا كان إيه؟ اللي مفروض أعتذر لهم بجد هم أهلي وأصحابي اللي شايفني بقالي 3 أيام بيتخطف عرضي وشرفي وبيتشهر بيا من إعلام وصحافة بلدي، دول اللي مفروض فعلا أعتذر لهم.

أنا يعني حابب من الفيديو ده أوجه الشكر لكل الناس اللي دعمتني وبعتت لي وسندتني من صحافة محترمة من إعلاميين محترمين من أصحاب وأهل وجمهور بيبعت لي مسجات أو دافع عني في الكومنتات، شكرا ليكم ويا رب دايما أفضل عند حسن ظنكم, وبالنسبة للقب صوت الشعب اللي مضايق البعض، فوالله أنا ما طلعتوش على نفسي، والله أنا في ناس شافتني بعبر عنهم وبتكلم عنهم ومن حقي أفتخر بحاجة زي كدة وأخلي بالي وأخدها حافز ليا أن أنا دايماً أفضل في كل الأفلام اللي جاية أتكلم عن الناس وأعبر عنهم وأخلي بالي يعني من المحتوى اللي بقدمه من الأفلام اللي بقدمها. يعني هنلوم الناس كمان إنهم بيقولوا كده. عموماً أنا هفضل دايماً أتكلم عن الناس وهفضل دايماً أعبر عنهم وهفضل دايماً أنادي بخلق فرص جديدة للشباب في كل المجالات. ومن الفيديو ده بناشد سيادة الرئيس عبد الفتاح السيسي. أنا يا ريس وكل الشباب اللي في سني محتاجين فرص ومساحة حقيقية في كل المجالات عشان زي ما حضرتك قلت كده البلد دي مش هتقوم غير بشبابها. ده كان ردي الأول والأخير عن الموضوع ده. واستنوا أفلامي اللي جاية وشكراً.