ميار الببلاوي: غلطت لما طلعت مع بسمة وهبة في البرنامج كانت مستميته على الترند

ردت الفنانة المعتزلة ميار الببلاوي على كل من هاجمها بسبب ظهورها في برنامج "العرافة" في رمضان 2024 وهو ما سبب أزمة كبيرة لها بسبب تصريحاتها عن طلاقها من زوجها.

وأكدت ميار الببلاوي أنها لم تكن تعرف أن كل هذا سيحدث وأنها فوجئت بأسئلة الإعلامية بسمة وهبة ووصفت ما فعلته الأخيرة أنها كانت تريد "الترند".

وكتبت ميار الببلاوي عبر حسابها على Facebook: "كل الناس عماله تقولى غلطتك طلعتي في برنامج بسمة طيب اقسم بالله ماكنت اعرف إنها هتكون هجومية كده اتلجمت مكنتش عارفة أرد خالص وكل اللي كان في دماغي إني ألغي الحلقة، ليس كل منطوق مقصود أنا مطلقتش 11 مرة كان قصدي إن جوزي على طول بيقول عليا الطلاق، يا جماعة دا بتاع البطيخ بيحلف يمين طلاق إن البطيخة حمرا يبقى مراته طالق الناس ماسكه على كلمة واحدة تستاهلي عشان طلعتي مع بسمة".

وتابعت ميار الببلاوي: "خلاص ارحموني اعترفت بغلطتي بس أنا صاحبتي دعتني لبرنامجها وأنا بحب بسمة ومن زمان وصورنا قبل رمضان بأسبوعين وأنا اقسم بالله عمري ما شفت برنامج العرافة دا قبل كده اللهم حلقة شاكوش ومراته، وعارفة بسمة طيبة وبتحبني فوجئت بالكاركتر اللي كانت متقمصاه في البرنامج كان كل همي احافظ على هدوئي واحترامي للمكان وارد على أى سوال بصراحة علشان المصداقية".

وأكملت ميار الببلاوي: "أنا كنت ضيفة في برنامج متشاف مع مذيعة كبيرة على قناتين كبار النهار والمحور أما الفلوس والله إني أخدت مبلغ لا يذكر وكنت مصممة ارجعه وألغي الحلقة واسألوا أستاذ شريف رئيس تحرير البرنامج، أرجوكم كفايه نقد واللي حصل فى الفيديو الناس اللي بتقول تمثيل ربنا يحسسكم بالقهرة ووجع قلب الشريفة الحرة المتقية ربها لما يتقال عليها زانية من شيخ، أنا غلطت لما قبلت أطلع مع بسمة ويشفعلي جهلي بالبرنامج وطبيعتة وغلطت أنها لما قالتلي 11 مرة مفهمتهاش أن حلف بالطلاق فوق المية مرة يعني أبقى مطلقة مية مرة، وبعدين محدش ليه دعوة بحياتي الشخصية جوزي وابني وجوازي خط أحمر من هنا ورايح والناس اللي بتقولى إنتي اللي اتكلمتي وقولتي وعاوزين يرجموني أنا كنت بتسأل وبحاوب مش أنا اللي فتحت أي كلام وكنت بحاول اتهرب من الإجابة بس بسمة كانت مستميته على الترند من كلامي مكنتش مدياني فرصه نهائي غير اللي اتمنتج".

واختتمت ميار الببلاوي كلامها: "أنا كتبت لأني مخنوقة من الكومنتات وفي النهاية أنا طلعت في برنامج على فضائيات محترمة على قناة كبيرة مش طلعت في شقة مشبوهة تعبت كفاية استحلفكم بالله متسيبوش اللي عمله واللي قاله الشيخ وتمسكوا في غلطة أنا معترفة بيها وبحكم شغلي كمذيعة بعرف اسأل كويس بس بجد معنديش ملكة الرد ومش هقدر أوعدكم إني لو اتطلبت ضيفة في أي برنامج هرفض لأن دا شغلي بس حياتي الشخصية خط أحمر ودا هيكون شرطي أنا خدت كل الأدوية بس والله من النكد ما قادره أنام وكمان بدأنا الإجراءات القانونية سمعت إنه مسح الفيديو بس خلاص حفظناه والمستشار القانوني بدأ شغله وحسبي الله ونعم الوكيل وبعتذر على عدم الرد على السادة الصحفيين لأن لم يعد لدي ما أقوله والأمر ترك للقانون والقضاء المصري الشامخ وعند الله تجتمع الخصوم".

وكانت ميار الببلاوي قالت خلال حلقتها في برنامج "العرافة" إنها عادت لزوجها الأول بعد 3 زيجات أخريات وطلاق 11 مرة.

وعلق الشيخ محمد أبو بكر على تصريحات ميار الببلاوي أنها تطلقت من زوجها الحالي 11 مرة، وتزوجته أكثر من مرة بعد طلاقها من كل زيجاتها، قائلا: "ماكنتش حابب أتكلم، لكن بعد أن تكلمت الأخت ميار الببلاوي عن أنها اتطلقت من زوجها 11 مرة وكانت بترجع بمكالمة ولجأوا للمحلل، فهي أعادت للذاكرة فيلم عادل إمام اللي كان فيه دا، وبدأ الناس تتكلم، والبعض بدأ يحتال على الشرع ويلجأ لهذه الطريقة، إبراء لذمتي، الإسلام بريء مما قالته ميار الببلاوي شكلا وموضوعا، كلامها لا يمت للدين بصلة، ربنا جعل الطلاق 3 مرات مش 11 مرة، وجعل المرة الثالثة حاسمة وفاصلة".