«حرام عليك لما تشوه سمعتي».. أول رد من رجب بحة على اتهام مرتضى منصور له بممارسة السحر

اتهم مرتضى منصور رئيس نادي الزمالك السابق شخص يدعى رجب بحة في القيام بأعمال سحر وهو ما تسبب في خسارة فريقه 1-4 في بطولة الدوري.

وقرر صاحب الصورة التي نشرها «منصور» ويدعى رجب بحة الرد على تصريحات رئيس الزمالك المعزول، مؤكدا أن مرتضى أساء إلى سمعته وسمعة أسرته، وقال: "حرام عليك لما تشوه سمعتي بالطريقة دي".

وأضاف في فيديو على مواقع التواصل الاجتماعي: "أقسم بالله حرام الاتهام ده، أنا راجل حافظ كتاب الله والسحر شرك بالله، وأنا راجل لدي أولاد وبنات في سن الزواج، أنا لا أعرف سحر ولا أعرف أعمل الحاجات دي، ليه الاتهام بالباطل ودخول أزمة لا علاقة لي بها على الإطلاق؟!".

ووصف الحاج بحة -كما يناديه جيرانه- حياته بالبسيطة للغاية، موجها حديثه لمرتضى منصور قائلا: "لو تيجي حضرتك تتفرج على المعيشة اللي إحنا عايشينها، أو البيت اللي أنا عايش فيه، مش هترضاه أنت نفسك".

وردا على اتهامه بالسحر، قال: "قسما بالله العظيم أنا ولا بعرف أعمل حاجة من الحاجات دي. واللي بيعمل الحاجة دي أصلا بيبقى راجل مشرك بالله. والإشراك بالله ده بيبقى لناس ربنا نزع من قلوبهم الرحمة".

كما دافع عن الحاج بحة جاره قائلا: "ده راجل معاه عيال ومعاه بنات ومعاه أسرة، إزاي كده.. ده جيرانه بينادوه الحج رجب وبيأم المصلين في المسجد".

وكان مرتضى منصور خرج في تصريحاته عبر قناة الزمالك قائلا: "أنا مش هقول منشطات، بس في حاجة مش طبيعية. في واحد بعتلي رسالة لصورة الساحر اسمه رجب بحة، وطلع من الفيوم، بلد سيد عبدالحفيظ، ياريت حد من الفيوم يطلع يقولي مفيش حد بالاسم ده".

وواصل: "أنا كنت بلاعب الجن الأزرق، لكن الجن الأحمر مقدرش، برافو عليك يا سيد عبدالحفيظ، عمرو السيسي اتصاب بعد ما نزل ومسكنا الماتش، عشان الجن اشتغل".