السيسي: ”اتصلت بالإسرائيليين وقولت ليهم عايزين ندخل قوات رفح والشيخ زويد والعريش”

تحدث الرئيس عبد الفتاح السيسي، عن خطة الإرهابيين لتدمير مصر خلال عام 2011، قائلًا: اتعمل ولاية وقضاء شرعي على حد تعبيرهم وحاجات من هذا القبيل في سيناء.

وأضاف الرئيس، خلال الندوة التثقيفية الـ37 للقوات المسلحة بمناسبة الاحتفال بيوم الشهيد: يوم 28 يناير كان خلاص نتيجة التعدي ده بقت الأمور خارج السيطرة، وقولت للمشير طنطاوي وقتها ممكن تبقى فيه مشكلة كبيرة جدًا لو الأمر استمر كده، لأن هما ممكن يعملوا عمليات عبر الحدود ضد إسرائيل، فلازم إسرائيل هترد وطبعًا دي هتبقى مشكلة كبيرة جدًا، ممكن تؤدي إلى صراع كبير أوي وده ممكن يكون هدفهم في النهاية.

وتابع الرئيس: كان القرار وقتها من المشير، ندخل نتبع الإجراءات المطلوبة مع الإسرائيليين في الوقت ده واتصلت بيهم قولتلهم إحنا محتاجين ندخل قوات دلوقتي في العريش ورفح والشيخ زويد عشان نسيطر على الموقف هناك والحقيقة هما كانوا متفهمين ده وقالوا ادونا خبر بالقوات اللي هتبقى موجودة أد إيه ونسقوا معانا واستمرينا من الوقت ده لحد دلوقتي.

وواصل: بس يمكن حجم القوات اللي كان موجود خلال الـ8- 9 دول من 2011 لحد النهاردة زادت القوات كل مرة عشان نتعامل مع التحديات الموجودة هناك.

واستطرد: بحكي الحكاية دي لأني في لقاء سابق قولت خلي بالكم أوعى عنيكم تغفل أو تنام عن حاجة جوه مصر، وكمان مش بس كده كمان ننتبه على أي حاجة ممكن تمسنا بره مصر، وعاوز أقول للشعب المصري كله أن كان عندي خيارين لما توليت المسئولية، خيار أني أشيلكم الهم وأخلي الموضوع معاكم وزي ما قولت قبل كده أننا نوقف كل الأعمال ونعمل حشد إعلامي ضخم على الحرب اللي بتتم هناك.