• الرئيسية
• السوشيال

أثار المطرب عمر كمال ضجة واسعة وجدلًا كبيرًا بتصريحاته الأخيرة، والتي وصفها عدد من رواد مواقع التواصل الاجتماعي بـ «المستفزة».

تحدث عمر كمال عن ترك العمل في الكباريهات، قائلًا: «بطلت شغل في كباريهات علشان فلوسي تبقى حلال وده بعد ما سألت وفهمت إن الغناء على حسب هغني فين ولمين، وأنا لما أغني في الأفراح يبقى فلوسي حلال ومش حرام لأني بحيي فرح للمتزوجين وعمل الإشهار».

وتابع: «أنا بروح أعمل تبرعات وأعمال خير وبساعد ناس بتغسل كلى ومرضى، ومشغل أخويا معايا وبهتم بأهلي، أي فلوس بتدخلي من شغلي في الفن لازم أطلع منها حاجة لله، يعني بحس إن مثلا لما حد عايز يغسل كلى أو علاج أورام أو أي حاجة من دي أكيد الحاجات دي هتشفع لي، ولو فلوسي حرام هعرف أتفاهم مع ربنا وأقوله».

وقال عمر كمال عن عائلته: «أمي منتقبة وأبويا إمام جامع، وكان شغال لحام باليومية... ومكنتش أقدر أقول له عن حبي للغناء كان يموتني، وبعد وفاة والدي ذهبت إلى القاهرة من أجل العمل، لأن حالنا كان بسيط... ونزلت من السويس إلى القاهرة ومعايا 10 جنيه واشتغلت في كل الشغلانات، في مجال الجزم، وحسيت بالإهانة فسبتها، واشتغلت في بنزينة، ودلوقتي بجيب بدل من أغلى المحلات في العالم».

عربيات عمر كمال

وفاجأ الجمهور بحديثه عن امتلاكه 5 سيارات، قائلًا: «عندي 5 عربيات والأخيرة اشتريتها بـ 9 ملايين جنيه مش كتير مرسيدس G-Class وبستثمر في العقارات مفيش حتة في مصر مش حاطط إيد فيها».

واستكمل عمر كمال حديثه عن علاقاته العاطفية: «كنت مرتبط بواحدة بتطلب مني تكاليف كتيرة وكانت خطيبتي لما تطلب مبلغ كبير وأتضايق تقولي: يا عم اعتبرهم أوردرين طاروا.. إحنا خدنا حتة شعرية من طبق كشري.. وسيبت الإنسانة اللي حبيتها بسبب إني مش هعرف اتسامح مع ماضيها، ومكنش هعرف أظهرها للنور، وعمري ما هتجوز صالونات أنا لازم أتجوز عن حب، وأنا شخص مش مبادر ولازم اللي قدامي هى اللي تبادر».

واختتم: «من كتر ما أنا زمان اتداس عليّا أوي، كنت بقول لربنا في العمرة يا رب اديني شهرة وفلوس ووضع، وخد مني الخلفة والجواز.. كل حاجة دعيت بيها أخدتها.. إلا موضوع الجواز، بحس إن ربنا وقفهولي، وبحاول أدعي بالعكس دلوقتي مش ماشية خالص، والحاجة لو بقرش وأنا دخلت اشتريتها بتبقى بـ10 قروش، وعيب أفاصل وأنا عمر كمال».