• الرئيسية
• تحقيقات

كشفت التحقيقات في واقعة مطاردة طريق الواحات تفاصيل جديدة، في الواقعة التي أصيبت فيها فتاتان نتيجة مطاردتهما من قبل 3 شباب.

نص التحقيقات حيث جاءت أقوال المجني عليها الأولى أمام جهات التحقيق كالآتي:

اللي حصل إن أنا كنت في البيت كلمت صديقتي نزال عشان أنا حفلة تخرجي في 2025/8/21 وكنت عاوزة أنزل أشتري حاجات للتخرج فكلمتها امبارح الصبح قولتلها تعالي ننزل نشرب حاجة وبعدين نروح تشتري الحاجات، نزلنا روحنا الحي الأول عشان كنت هشتري فستان من الحصري، فقعدنا في كافيه بنزينة في الحي الأول وشرينا قهوة.

وأضافت: كان في شوية شباب قاعدين على ترابيزة برا واحنا دخلنا وقعدنا جوا على البار، وطلبنا حاجة نشربها والبار قدامه بيبص على المكان اللي الشباب قاعدين فيه فاضطرينا نقوم من على البار عشان منكونش في وش الشباب، لقيتهم قاموا وغيروا المكان وجم قعدوا في وشنا، فأنا نزلت الستارة اللي تمنعهم من رؤيتنا.

وتابعت: العاملين بالمكان قالولهم إنهم عاوزين ينظفوا المكان فخرجونا برا عشان ينظفوا المكان فخرجنا وقعدنا على ترابيزة ناحية الشباب، قعدنا شوية وبعدين قولتلها يالا بينا نمشي وركبنا العربية واتحركنا، واتفاجئنا بـ 3 شباب ركبوا عربياتهم وخرجوا ورانا على الطريق وفضلوا يرخموا علينا بحركاتهم على الطريق، وبدأ واحد فيهم راكب عربية بي إم يزنق عليا في الطريق جامد وبدأ العربية التانية كيا كانت على يميني والعربية التالتة نوعها جبلي كانت على شمالي.

وتابعت: كانت الـ 3 عربيات محاصرانا من كل اتجاه، وبعدين بدأ اللي في العربية البي إم يقولي انزلي طيب اركبي معايا نشرب حاجة في مكان هقولك على حاجة.

وأوضحت المجني عليها الأولى: أنا حاولت أفاديهم وأمشي بسرعة لكن المتهمين فضلوا يزنقوا علينا، وبدأ واحد فيهم يزعق ويعلي صوته، بدأت أتوتر على الطريق واتفاجئت بعربية قدامي وخبطت فيها بدون قصد.