استشاري تربوي: العناد والعصبية عند الأطفال صفات مكتسبة من الأسرة
أجابت أستاذة ولاء شبانة، الاستشاري التربوي والنفسي، على سؤال سيدة من البحيرة تدعى كرمة، عن كيفية التعامل مع الأطفال الذين يظهرون سلوكيات مثل العناد والعصبية؟.
وقالت الاستشاري التربوي والنفسي، خلال حوار مع الإعلامية مروة شتلة، بحلقة برنامج "البيت"، المذاع على قناة الناس، اليوم الثلاثاء: "هذه السلوكيات ليست صفات فطرية يولد بها الطفل، بل هي مكتسبة من البيئة المحيطة".
وقالت: "لما أجي أقولك إن طفلك عنده ست سنين وعصبي جدًا، لازم نوضح إن الست سنوات دول مرحلة نمو طبيعية جدًا، وما فيش طفل بيولد عنيد أو عصبي، هذه صفات بتتكون نتيجة لتفاعلاته مع محيطه ومعاملة الأشخاص اللي حواليه".
وأضافت: "اللوم دايمًا بنرميه على الأطفال، لكن لما نقول إن الطفل عنيد أو عصبي، هذه الكلمات بتترسخ في دماغه بشكل كبير، وبتأثر عليه، ممكن تبدأ تلاقيه بعد كده بيستخدم نفس السلوكيات ويتعامل مع المواقف بنفس الطريقة، وكأنها سلوك عادي وطبيعي".
وأشارت شبانة إلى أن الأطفال يتعلمون السلوكيات عن طريق المحاكاة، حيث يرون من حولهم يمارسون سلوكيات معينة، فيبدأ الطفل في تقليدها، موضحة: "الطفل اللي بيشوف مثلاً إن باباه بيعاند معاه أو مع الآخرين، بيبدأ يظن أن العناد ده هو الطريقة الطبيعية للتعامل مع الأمور، هو بيشوف التسلط والقوة ويبدأ يطورها عنده، الطفل بيكتسب الصفات دي لما يشوف استجابة من البيئة المحيطة به، ويبدأ يكرر السلوك لأنه بيلاقي إنه بيحصل على ما يريده".
وأكدت أيضًا على مسألة الاستجابة للسلوكيات غير المرغوب فيها، مشيرة إلى أنه في بعض الأحيان الأمهات يتجاوبن مع الأطفال في مواقف غير صحيحة بسبب الخوف من العواقب الاجتماعية، مثل خوف الأم من أن يظن الآخرون أنها لم تربي ابنها جيدًا، موضحة: "كتير من الأمهات بيقولوا: 'ما هو الولد هيعيط هيفضحنا قدام الناس'، وللأسف ده بيشجع الطفل على العناد أكثر، لأنه بيعرف إن العياط بيجيب نتيجة".
وشرحت أستاذة شبانة طريقة التعامل مع سلوكيات العناد والعصبية لدى الأطفال، قائلة: "أهم حاجة إننا نعلم الطفل أن العياط أو التصرفات العنيفة مش هيجيب نتيجة، ممكن الطفل يعيط، لكن من غير ما ننفعل أو نرضخ للطلب، في لحظة ما، لو الطفل هدي، ندي له ما يريد، ولكن مش قبل ما يهدأ".
وتابعت: "الطفل ده مش هيفهم الدرس لو إحنا استجبنا له في كل مرة، لكن لما نكرر الموقف ونتعامل بحزم وهدوء، هيبدأ يتعلم أن التصرفات غير العقلانية مش هتجيب له النتيجة المطلوبة، وبالتالي هيتعلم يفكر ويتصرف بعقلانية أكتر مع الوقت".
