أعمل ايه لو ابني سألني ”أنا جيت إزاي يا ماما ؟”.. ولاء شبانة تجيب
أكدت ولاء شبانة، الاستشاري التربوي والنفسي، أن الفضول المعرفي عند الأطفال، وخصوصًا فيما يخص الأسئلة الوجودية أو الفروق بين الجنسين، هو أمر طبيعي جدًا، بل علامة على النمو العقلي السليم، وأنه لا يجب على الأهل التعامل مع هذه الأسئلة بردود عنيفة أو بإحراج الأطفال.
وقالت الاستشاري التربوي والنفسي، خلال حوار مع الإعلامية مروة شتلة، بحلقة برنامج "البيت"، المذاع على قناة الناس، اليوم الثلاثاء: "الأسئلة دي – سواء عن الهوية أو الجنس الآخر – كلها أسئلة طبيعية جدًا، ده طبيعي، مش حاجة غريبة ولا شاذة، وعلشان كده أول حاجة لازم نعرفها إننا ما (ناكلش) ولادنا لما يجوا يسألونا: أنا جيت إزاي؟ أو ولدتيني إزاي؟ أو الحاجات اللي بتخلي بعض الأمهات والآباء يتوتروا".
وتابعت: "الرد الأول للأسف بيكون: (عيب، ما يصحش، إنت بتقول إيه؟)، وده اللي بيخلي الولد أو البنت يروحوا يدوروا في أماكن تانية، ممكن تكون خطر، وممكن كمان إحنا اللي نيتنا بتبقى وحشة، مش هما، لأن هما في الأول والأخير مش بيقصدوا حاجة، هما بيسألوا من فضول طبيعي وسليم".
وأكدت: "دي حاجة نورمال جدًا بالنسبة للأطفال، مؤشر على معدل ذكاء طبيعي ونمو فسيولوجي طبيعي، الطفل لما يلاحظ إن فيه فرق بينه وبين أخته، أو بينه وبين زميلته في الفصل، طبيعي إنه يسأل، هو مش جاي يتجاوز، هو جاي يفهم".
وأضافت: "بيسأل: الدنيا جت إزاي؟ حصل إيه؟ ربنا فين؟ ليه ما بنشوفش ربنا؟ الأسئلة الوجودية دي بكل أشكالها، طبيعي جدًا إن الطفل يسألها، العكس، لو ما سألش خالص، أو ما كانش عنده حتى فضول نسبي، أنا أقلق! لأن الفضول ده بيختلف من طفل للتاني حسب نسبة الذكاء، وحسب كم المعلومات اللي اتعرض لها أثناء حياته".
وتابعت: "احنا محتاجين نكون دايمًا جاهزين لأسئلة أولادنا، من غير عصبية، ومن غير ما نكتم فضولهم، بالعكس، الفضول ده نعمة، وهو البوابة إننا نعلّمهم الصح قبل ما يروحوا يتعلموه من حد تاني، أو من مصدر غلط".