جار صيدلي حلوان يدلي بأقواله أمام محكمة الجنايات.. تفاصيل

بدأت محكمة جنايات حلوان اليوم الأحد، ثانى جلسات محاكمة 7 متهمين، فى واقعة سقوط صيدلى حلوان، التى تنظرها الدائرة 29 بمجمع محاكم القاهرة الجديدة، وكانت الجلسة الأولى شهدت إدعاء محامين أسرة صيدلى حلوان بمبلغ خمسمائة ألف جنيه، وأعتراض محامى أسرة زوجة صيدلى حلوان.

حيث استمعت المحكمة لأقوال وبسؤال الجار الملاصق لشقة صيدلى حلوان المتوفى المدعو مصطفى محمد صديق موسى، 40 سنة، مدرب ألعاب رياضية، ومقيم فى نفس البرج، قال: «اللي حصل أني كنت نازل من بيتى لقيت بواب العمارة اسمه جمعة وشهرته رجب بيقولي أنت مسمعتش أى صوت جنبك ترزيع أو خبط قولتله لأ، وبعدها طلعنا من تحت لشقة دكتور ولاء صيدلى حلوان، لأن رجب قالي أنه باعت استغاثة على الواتس آب على جروب العمارة فطلعت معاه وفتح ليا راجل كبير، قولتله فى حاجة قالي دى مشكلة عائلية، وملكش دعوة بيها وراح ذقني فى صدرى، وبيقفل الباب عافية روحت حطيت رجلي ومنعته يقفل الباب، وذقيت الباب ودخلت علي أول الباب ولقيت أن فيه رجالة قاعدة شكلها كويس، وواحدة ست تقريبًا مرات دكتور ولاء ولقيت دكتور ولاء واقف علي يمين الباب قدام شوية وظهره للحيطة كأنه متذنب ومبصليش ولا أتكلم خالص ولما سألتهم هو فى إيه قالولي أنها مشكلة عائلية وملكش دعوة بيها عشان أسرار فخرجت برة الشقة وفى اتنين خرجوا معايا منهم برة باب الشقة وقالولي أن مراته عرفت إنه متجوز عليها وهم خلوه يتصل بمراته الجديدة ويطلقها فى التليفون وكده الموضوع اتحل خلاص وطلبوا منى أمشي».

وتابع: «وفعلًا نزلت ومشيت وبعد كده علي الساعه الثالثة العصر تقريبًا لقيت مراتى بتتصل بيا وبتقولي أنا سامعة صوت تلطيش أقلام ومراته بتقوله فين الفلوس لأموتك وواحد تانى قاله أنا مش راضي أعمل فيك حاجة عشان خاطر ابنك وبعد كده قولتلها اتصلي بالشرطة وده كل اللى حصل»، مؤكدًا أنه غير متأكد أن الشخص الذى كان ظهره صيدلى حلوان من عدمه.