مفاجآت في قضية «فاطمة عروس بورسعيد» «شهد» تكشف أمام النيابة تفاصيل الساعات الأخيرة وتوضح حقيقة علاقتها بخالها والمجني عليها
كشف المستشار هشام ابراهيم المحامي بالنقض
من خلال تحقيقات النيابة العامة في واقعة وفاة الفتاة «فاطمة ياسر خليل»، المعروفة إعلامياً بـ«عروس بورسعيد» (15 عاماً)، داخل مسكن خطيبها بجمعية الكاب في حي الجنوب بمحافظة بورسعيد، عن تفاصيل جديدة أدلت بها «شهد» — واسمها الرسمي في الأوراق «ليلى هيثم » (18 عاماً) — نجلة شقيقة خطيب المجني عليها.
وأوضحت الشاهدة في أقوالها أمام النيابة العامة طبيعة علاقتها بخالها خطيب المجني عليها، مشيرة إلى أنه الأقرب إليها والمقرب من تفاصيل حياتها وأنها مخطوبة منذ ثلاثة أشهر، كما تناولت تفاصيل الخلاف السابق الذي وقع في بداية الخطوبة عقب قراءة الفاتحة بشأن تحضير الشاي، مؤكدة أنها اعتذرت لأسرة المجني عليها لاحقاً وأنها صالحت «فاطمة» وأشادت بها قائلة إنها اعتبرتها مثل شقيقتها.
وتطرقت «ليلى» في شهادتها إلى أحداث يوم الواقعة، حيث أشارت إلى حضور المجني عليها ووالدتها لتناول الإفطار، وخروج المجني عليها مع خطيبها لجلب السحور، ثم السحور والنوم، وصولاً إلى صباح اليوم التالي الذي شهد تحرك أفراد الأسرة ومغادرة البعض لأعمالهم ومدارسهم، ثم حديثها مع المجني عليها وتنزهها معها داخل «الدوار» قبل دخول المجني عليها إلى غرفة الأطفال للنوم. كما أشارت إلى تعرضها لألم صحي ونزولها للجلوس بجوار جدتها ووالدة المجني عليها، ثم اكتشاف عدم وجود المجني عليها في الغرفة والبحث عنها قبل العثور عليها متوفاة في الشقة العلوية، مؤكدة أنها لم تشهد كيفية حدوث الوفاة أو وجود شبهة جنائية بعينها وقت شهادتها، وموضحة ما علمته بشأن الخلاف السابق على الشقة وتسويته بين خالها وشقيقه.
وتواصل جهات التحقيق في موقع رأي عام متابعة مجريات القضية وملابساتها وفق ما هو ثابت بالأوراق الرسمية وتقارير الطب الشرعي والأدلة الجنائية.
تفريغ نص أقوال «شهد» (ليلى هيثم محمد تاج الدين حسين) في النيابة العامة
بيانات الشاهدة:
- الاسم: ليلى هيثم محمد تاج الدين حسين (المعروفة بشهرتها: شهد)
- السن: 18 عاماً
- المهنة: ربة منزل
- محل الإقامة: عمر بن عبد العزيز، عمارة 7 ب، شقة 9، الزهور، بورسعيد
- صفة سؤالها: شاهدة (عقب حلف اليمين)
نص السؤال والإجابة كما ورد في محضر التحقيق:
- س: ما علاقتك بالمتوفاة إلى رحمة مولاها / فاطمة ياسر خليل إبراهيم إسماعيل؟
ج: فاطمة خطيبة خالي.
- س: ما معلوماتك بشأن الواقعة محل التحقيقات؟
ج: اللي حصل إن أنا اتعرفت على فاطمة الله يرحمها لما خالي خطبها في شهر 11 اللي فات وعلاقتي أنا وخالي كويسة بسبب إنه أقرب حد ليا وبيجيبلي كل اللي أنا عايزاه ومبيزعلنيش وهو اللي مربيني من صغري ويعتبر صاحبي وبحكي ليه كل حاجة وأنا مخطوبة بقالي 3 شهور وبحب خطيبي من وأنا صغيرة وهنتجوز بعد خمس شهور وكانت في مشكلة مع بابا وروحت بيت جدي في الجنوب من حوالي 15 يوم قبل ما فاطمة خطيبة خالي تيجي هي وأمها ولما جت فاطمة الله يرحمها أنا استقبلتها وقعدت معاها في الأوضة اللي هي بتتقال عليها البرندة وقعدت أتكلم معاها بخصوص خالي وقالت ليا إنها بتحب خالي ولما بيبعد عنها بتكلمه في التليفون وعايزة تفضل معاه طول حياتها ومش عايزة تبعد عنه وإن هي شايفاه الراجل اللي هتكمل معاه حياتها وأنا حكيت ليها عن محمد خطيبي وإن أنا بحبه برضو من صغري وبعدها جبت ليها هدية دبدوب وصالحتها عن أي حاجة حصلت بينا لأن حصل مشكلة بينا في بيتنا بسبب إن خالي قالي قومي اعملي شاي وقولت لخالي في ودنه أنا هو أنا مش لسه عملالك شاي وفاطمة وقتها زعلت وقالت ليا هي دي مستاهلة تكلميه في ودنه ومامتها قالتلي إحنا مش هناكل يا محمود يا شهد قومت قولتلها إنتي هتعرفيني هقول إيه لخالو وما أقولش إيه وأخدت نفسي ودخلت المطبخ وفاطمة جت تعمل هي الشاي قولت ليها شكراً وسيبي إنتي الكوباية وأنا هعمل أنا الشاي وعملت الشاي وحطيته لخالي وطلعت قعدت في الصالة لحد ما ماما جت وماما بتعمل حاجة في المطبخ فشاطت وروحت وقفت في البلكونة لأن كنت اتخنقت من ريحة الشياط وأم فاطمة قالت تعالي اقعدي جنبي يا شهد وسألتني إيه اللي مزعلك من فاطمة قولت ليها مفيش حاجة مزعلاني وبعدها قولت ليها علشان فاطمة بتدخل بيني وبين خالو وبعد كدا طنط أم فاطمة قالت ليا إنتي مش بتحبي فاطمة يا شهد وفاطمة ساعتها قالت اللي يحبني يحبني واللي ما يحبنيش ما يحبنيش بعد كدا ماما قالتلي ما ترديش وزعقتلي وأم فاطمة كانت عايزة تمشي وماما وخالي محمود قالو ليها هي بنتك زي فاطمة ومشيوا من عندنا وهما زعلانين مني وبعدها بكام يوم كلمتهم في التليفون واعتذرت ليهم عن اللي حصل والمشكلة دي كانت في بداية الخطوبة بعد قراية الفاتحة علشان كدا كنت بصالح فاطمة عن المشكلة دي وفاطمة ردت عليا وقالت أنا مش زعلانة منك وإنتي زي أختي، وبعدها طلعت أنا وهي ونزلنا تحت وخالي محمود كان جه من الشغل وكان داخل يغير وساعتها المغرب باقي عليه نص ساعة قعدت فاطمة تتكلم مع خالي محمود شوية وبعدها فطرنا كلنا وبعدها اتفرجنا على المسلسل على التليفزيون وبعدها خالو محمود أخد فاطمة على الموتسيكل لوحدهم وراحو يجيبوا سحور وكنت عاوزة أروح معاهم بس بابا مرضاش لأن الجو كان برد وبعدها دخلنا نمنا وصحينا اتسحرنا وصلينا الفجر ودخلنا نمنا وتاني يوم الصبح طنط أم فاطمة صحت راحت الحمام وبعديها صحيت وروحت الحمام وبعدها أم فاطمة طلبت مني إن أطلع أقعد جنبها على السرير وجيت أصحى فاطمة ومرديتش تصحى فقعدت شوية وطنط قالتلي صحيها وقولت سيبيها يمكن عايزة تنام وأصرت إن أصحبها وصحيناها أنا وأمها بالهزار والضحك فصحت وجت جدتي قالت لينا صباح الخير وبعد كدا نزلت وبعدها جه خالي محمود قالي طنط أم فاطمة صباح الخير يا ماما ومتصحنيش يا شهد لا إنتي ولا فاطمة وسيبوني أنام لأن أنا منمتش ومتصحونيش إلا الساعة 12 الظهر وروحت قولتله مين اللي يصحيك قالي أم فاطمة اللي تصحيني بعدها أم فاطمة قالت إنها هتروح تقعد مع جدتي وقولت ليها أنا وفاطمة هننزل معاكي وساعتها فاطمة قالت إن عايزة تنام وقولت ليها معلش قومي اقعدي معايا وأمها قالت ليها قومي اقعدي مع شهد يا فاطمة ونزلنا وأم فاطمة وجدتي قعدوا يجهزوا الأكل واتمشيت أنا وفاطمة في الدوار واتكلمنا وقتها وقالت إن خالو محمود كان عاوزها من زمان وقالت ليا إن خالو محمود شغال مع أخوها في فرن عيش ولما شافها أعجب بيها وطلب إيدها وإحنا فاتحين محل عطارة وكانت جاية تشتري حاجة وشافها فطلبها للخطوبة وأهلها وافقوا وقالت ليا إن هما كانوا عاوزيني لخليل أخوها وبعد كدا فاطمة قالت ليا أنا عاوزة أنام ورحت معاها دخلتها أوضة الأطفال وبعد كدا أنا روحت الحمام وبسبب إن أنا عندي البواسير كان في دم بينزل مني فنزلت لجدتي وأنا بعيط من الوجع وجدتي قالت ليا لما أخوالك يجوا هتروحي للدكتور وقعدت جنب أم فاطمة وخالي السيد وعبد الله وحمادة راحوا يصرفو الكيماوي وساعتها قولت لأم فاطمة إن أنا اتصالحت أنا وفاطمة لما لقيتها زعلانة وقالت أنا مش زعلانة خلاص منك وطنط / دعاء محمود ناصر مهران مرات خالي السيد نزلت الساعة 11 الصبح وكانت بتغسل الهدوم تحت قدام البيت ولما أم فاطمة سألتها عن فاطمة قالت ليها إنها نايمة في أوضة الأطفال وفضلنا قاعدين لحد ما الساعة جت 12 الظهر وواحد جه ينده على خالو محمود وأم فاطمة قامت تصحيه وراحت تشوف فاطمة في الأوضة ملقتهاش فقعدنا ننده يا فاطمة يا فاطمة ودورنا حوالين البيت كويس ودعاء مكنتش بتنده معانا وخالو محمود طلع فوق لقيته بيصوت وقال فاطمة ماتت يا أمه فاطمة ماتت ومحدش يلمسها اتصلوا بالحكومة وخالي قالي امسكي أم فاطمة لأن مش عايز حد يلمسها قبل ما الحكومة تيجي ولما الإسعاف جه قال إن فاطمة ماتت طبيعية موتت ربنا وده كل اللي حصل.
- س: متى وأين حدث ذلك؟
ج: الكلام ده حصل يوم 2026/2/22 الساعة 12 الظهر بجمعية الكاب ري 5 – حي الجنوب – بورسعيد.
- س: ما سبب ومناسبة تواجدك بالمكان والزمان سالفي الذكر؟
ج: أنا كنت في بيت جدتي.
- س: وما هي بادرة لقائك بالمتوفاة إلى رحمة مولاها / فاطمة ياسر خليل إبراهيم إسماعيل؟
ج: أنا اتعرفت عليها لما اتخطبت لخالي محمود.
- س: ومتى تم خطبة خالك على المتوفاة إلى رحمة مولاها / فاطمة ياسر خليل إبراهيم إسماعيل تحديداً؟
ج: في شهر 11 اللي فات.
- س: وما هي طبيعة العلاقة بينك وبين خالك المدعو / محمود عماد عبد الله أحمد محمد الشناوي تحديداً؟
ج: علاقتي أنا وخالي كويسة بسبب إنه أقرب حد ليا وبيجيبلي كل اللي أنا عايزاه ومبيزعلنيش وهو اللي مربيني من صغري ويعتبر صاحبي وبحكي ليه كل حاجة وأنا مخطوبة بقالي 3 شهور وبحب خطيبي من وأنا صغيرة وهنتجوز بعد خمس شهور.
- س: ومتى تحديداً قمتي بالذهاب لمحل الواقعة؟
ج: كان في مشكلة مع بابا وروحت بيت جدي في الجنوب من حوالي 15 يوم قبل ما فاطمة خطيبة خالي تيجي هي وأمها.
- س: وما الذي حدث عقب وصول المتوفاة إلى رحمة مولاها / فاطمة ياسر خليل إبراهيم إسماعيل آنذاك تحديداً؟
ج: لما جت فاطمة الله يرحمها أنا استقبلتها وقعدت معاها في الأوضة اللي هي بتتقال عليها البرندة.
- س: وهل من ثمة حوار دار بينك وبين المتوفاة إلى رحمة مولاها / فاطمة ياسر خليل إبراهيم إسماعيل آنذاك تحديداً؟
ج: أيوة.
- س: وما هو مضمون ذلك الحوار؟
ج: أنا قعدت أتكلم معاها بخصوص خالي وقالت ليا إنها بتحب خالي ولما بيبعد عنها بتكلمه في التليفون وعايزة تفضل معاه طول حياتها ومش عايزة تبعد عنه وإن هي شايفاه الراجل اللي هتكمل معاه حياتها وأنا حكيت ليها عن محمد خطيبي وإن أنا بحبه برضو من صغري وبعدها جبت ليها هدية دبدوب وصالحتها عن أي حاجة حصلت بينا.
- س: وهل من ثمة خلافات حدثت بينك وبين المتوفاة إلى رحمة مولاها / فاطمة ياسر خليل إبراهيم إسماعيل قبيل تلك الواقعة؟
ج: أيوة.
- س: وما هي تلك الخلافات تحديداً؟
ج: لأن حصل مشكلة بينا في بيتنا بسبب إن خالي قالي قومي اعملي شاي وقولت لخالي في ودنه أنا هو أنا مش لسه عملالك شاي وفاطمة وقتها زعلت وقالت ليا هي دي مستاهلة تكلميه في ودنه ومامتها قالتلي إحنا مش هناكل يا محمود يا شهد قومت قولتلها إنتي هتعرفيني هقول إيه لخالو وما أقولش إيه وأخدت نفسي ودخلت المطبخ وفاطمة جت تعمل هي الشاي قولت ليها شكراً وسيبي إنتي الكوباية وأنا هعمل أنا الشاي وعملت الشاي وحطيته لخالي وطلعت قعدت في الصالة لحد ما ماما جت وماما بتعمل حاجة في المطبخ فشاطت وروحت وقفت في البلكونة لأن كنت اتخنقت من ريحة الشياط وأم فاطمة قالت تعالي اقعدي جنبي يا شهد وسألتني إيه اللي مزعلك من فاطمة قولت ليها مفيش حاجة مزعلاني وبعدها قولت ليها علشان فاطمة بتدخل بيني وبين خالو وبعد كدا طنط أم فاطمة قالت ليا إنتي مش بتحبي فاطمة يا شهد وفاطمة ساعتها قالت اللي يحبني يحبني واللي ما يحبنيش ما يحبنيش بعد كدا ماما قالتلي ما ترديش وزعقتلي وأم فاطمة كانت عايزة تمشي وماما وخالي محمود قالو ليها هي بنتك زي فاطمة ومشيوا من عندنا وهما زعلانين مني وبعدها بكام يوم كلمتهم في التليفون واعتذرت ليهم عن اللي حصل والمشكلة دي كانت في بداية الخطوبة بعد قراية الفاتحة علشان كدا كنت بصالح فاطمة عن المشكلة دي وفاطمة ردت عليا وقالت أنا مش زعلانة منك وإنتي زي أختي.
- س: وما الذي حدث عقب ذلك تحديداً؟
ج: بعدها طلعت أنا وهي ونزلنا تحت وخالي محمود كان جه من الشغل وكان داخل يغير وساعتها المغرب باقي عليه نص ساعة قعدت فاطمة تتكلم مع خالي محمود شوية وبعدها فطرنا كلنا وبعدها اتفرجنا على المسلسل على التليفزيون وبعدها خالو محمود أخد فاطمة على الموتسيكل لوحدهم وراحو يجيبوا سحور وكنت عاوزة أروح معاهم بس بابا مرضاش لأن الجو كان برد وبعدها دخلنا نمنا وصحينا اتسحرنا وصلينا الفجر ودخلنا نمنا.
- س: وما الذي حدث تفصيلاً عقب استيقاظك آنذاك؟
ج: تاني يوم الصبح طنط أم فاطمة صحت راحت الحمام وبعديها صحيت وروحت الحمام وبعدها أم فاطمة طلبت مني إن أطلع أقعد جنبها على السرير.
- س: وهل من ثمة حوار دار بينك وبين المتوفاة إلى رحمة مولاها / فاطمة ياسر خليل إبراهيم إسماعيل آنذاك؟
ج: أيوة.
- س: وما هو مضمون ذلك الحوار تحديداً؟
ج: جيت أصحى فاطمة ومرديتش تصحى فقعدت شوية وطنط قالتلي صحيها وقولت سيبيها يمكن عايزة تنام وأصرت إن أصحبها وصحيناها أنا وأمها بالهزار والضحك فصحت وجت جدتي قالت لينا صباح الخير وبعد كدا نزلت.
- س: وأين كان تحديداً المدعو / محمود عماد عبد الله أحمد محمد الشناوي آنذاك؟
ج: بعدها جه خالي محمود قالي طنط أم فاطمة صباح الخير يا ماما ومتصحنيش يا شهد لا إنتي ولا فاطمة وسيبوني أنام لأن أنا منمتش ومتصحونيش إلا الساعة 12 الظهر وروحت قولتله مين اللي يصحيك قالي أم فاطمة اللي تصحيني بعدها أم فاطمة قالت إنها هتروح تقعد مع جدتي.
- س: وما الذي حدث عقب ذلك حال وجودك مع المتوفاة إلى رحمة مولاها / فاطمة ياسر خليل إبراهيم إسماعيل آنذاك تحديداً؟
ج: قولت لأم فاطمة أنا وفاطمة هننزل معاكي وساعتها فاطمة قالت إن عايزة تنام وقولت ليها معلش قومي اقعدي معايا وأمها قالت ليها قومي اقعدي مع شهد يا فاطمة ونزلنا وأم فاطمة وجدتي قعدوا يجهزوا الأكل واتمشيت أنا وفاطمة.
- س: وأين تحديداً قمتي والمتوفاة إلى رحمة مولاها / فاطمة ياسر خليل إبراهيم إسماعيل بالذهاب آنذاك؟
ج: اتمشينا في الدوار واتكلمنا.
- س: والحديث الذي دار بينك وبين المتوفاة إلى رحمة مولاها / فاطمة ياسر خليل إبراهيم إسماعيل آنذاك تحديداً؟
ج: وقتها وقالت إن خالو محمود كان عاوزها من زمان وقالت ليا إن خالو محمود شغال مع أخوها في فرن عيش ولما شافها أعجب بيها وطلب إيدها وإحنا فاتحين محل عطارة وكانت جاية تشتري حاجة وشافها فطلبها للخطوبة وأهلها وافقوا وقالت ليا إن هما كانوا عاوزيني لخليل أخوها.
- س: وما الذي حدث عقب ذلك تحديداً؟
ج: بعد كدا فاطمة قالت ليا أنا عاوزة أنام ورحت معاها دخلتها أوضة الأطفال وبعد كدا أنا روحت الحمام وبسبب إن أنا عندي البواسير كان في دم بينزل مني فنزلت لجدتي وأنا بعيط من الوجع وجدتي قالت ليا لما أخوالك يجوا هتروحي للدكتور وقعدت جنب أم فاطمة وخالي السيد وعبد الله وحمادة راحوا يصرفو الكيماوي وساعتها قولت لأم فاطمة إن أنا اتصالحت أنا وفاطمة لما لقيتها زعلانة وقالت أنا مش زعلانة خلاص منك.
- س: وأين كانت المدعوة / دعاء ناصر محمود مهران تحديداً آنذاك؟
ج: طنط / دعاء محمود ناصر مهران مرات خالي السيد نزلت الساعة 11 الصبح وكانت بتغسل الهدوم تحت قدام البيت ولما أم فاطمة سألتها عن فاطمة قالت ليها إنها نايمة في أوضة الأطفال وفضلنا قاعدين لحد ما الساعة جت 12 الظهر وواحد جه ينده على خالو محمود وأم فاطمة قامت تصحيه وراحت تشوف فاطمة في الأوضة ملقتهاش.
- س: وما الذي حدث تحديداً عقب عدم تواجد المتوفاة إلى رحمة مولاها / فاطمة ياسر خليل إبراهيم إسماعيل آنذاك؟
ج: قعدنا ننده يا فاطمة يا فاطمة ودورنا حوالين البيت كويس ودعاء مكنتش بتنده معانا وخالو محمود طلع فوق لقيته بيصوت وقال فاطمة ماتت يا أمه فاطمة ماتت ومحدش يلمسها اتصلوا بالحكومة وخالي قالي امسكي أم فاطمة لأن مش عايز حد يلمسها قبل ما الحكومة تيجي ولما الإسعاف جه وكشف عليها.
- س: وما الذي أخبركم به القائم بالكشف على المتوفاة إلى رحمة مولاها / فاطمة ياسر خليل إبراهيم إسماعيل آنذاك؟
ج: قال إن فاطمة ماتت طبيعية موتت ربنا.
- س: وما هي الحالة التي شاهدت عليها المتوفاة إلى رحمة مولاها / فاطمة ياسر خليل إبراهيم إسماعيل آنذاك تحديداً؟
ج: لقيت فاطمة وشها أزرق ومنفوخ.
- س: وما هو رد فعلك آنذاك تحديداً؟
ج: قعدت أصوت وخبطت إيدي في الحيطة والكل قعد يصوت وقولت لأم فاطمة صحي فاطمة قالت ليا أختك ماتت.
- س: وهل نمي إلى علمك كيفية حدوث وفاة المتوفاة إلى رحمة مولاها / فاطمة ياسر خليل إبراهيم إسماعيل؟
ج: أنا عرفت إن فاطمة ماتت مخنوقة.
- س: وما كيفية التعدي على المتوفاة إلى رحمة مولاها / فاطمة ياسر خليل إبراهيم إسماعيل؟
ج: أنا معرفش هي ماتت إزاي.
- س: وهل كانت المتوفاة إلى رحمة مولاها / فاطمة ياسر خليل إبراهيم إسماعيل على قيد الحياة عقب وصولك إليها؟
ج: لأ هي كانت اتوفت الله يرحمها.
- س: وما طبيعة العلاقة بين المتوفاة إلى رحمة مولاها والمدعوة / دعاء ناصر محمود مهران؟
ج: معرفش لأن دي أول مرة أروح هناك وأشوفهم اللي اتنين مع بعض.
- س: وهل من ثمة خلافات بين محمود عماد عبد الله أحمد محمد الشناوي والمدعو / السيد عماد عبد الله أحمد محمد الشناوي؟
ج: كان في خلاف لأن خالي محمود مرضاش بالشقة اللي فوق واتفقوا إن خالي محمود هياخد الشقة اللي فيها دعاء وهي هتطلع فوق في الشقة اللي لسه بتتجهز اللي ماتت فيها فاطمة.
- س: وهل تم حل ذلك الخلاف؟
ج: أيوة.
- س: وهل كان يوجد للمدعوة / دعاء ناصر محمود مهران ثمة أشياء منزلية تخصها بالشقة الخاصة بخالك التي كانت تحت الإنشاء؟
ج: أنا معرفش.
- س: وما قولك فيما ثبت بأقوال المدعوة / دعاء ناصر محمود مهران بالتحقيقات إنها ذهبت إلى الشقة الخاصة بخالك لاقتناء بعض الأشياء المنزلية الخاصة بها؟
ج: أنا مشوفتش.
- س: ما قولك فيما ثبت بأقوال المدعوة / دعاء ناصر محمود مهران بتحقيقات النيابة العامة – تلوناها عليها؟
ج: معرفش.
- س: ما قولك فيما قرره المدعو / ياسر خليل إبراهيم إسماعيل، الطفلة المدعوة / حبيبة هيثم محمد تاج الدين حسين، المدعو / خليل ياسر خليل إبراهيم إسماعيل، المدعوة / صابرين مصطفى غريب محمود موسى، بتحقيقات النيابة العامة من أقوال؟
ج: اللي حصل أنا قولت عليه.
- س: وما قولك فيما هو ثابت بمحضر التحريات المحرر بمعرفة الرائد / أحمد مدحت رئيس المباحث والمؤرخ في 2026/2/26 الساعة 10:30 صباحاً والثابت به – تلوناها عليها تفصيلاً؟
ج: اللي حصل أنا قولت عليه.
- س: هل تشتبهين جنائياً في وفاة المتوفاة إلى رحمة مولاها / فاطمة ياسر خليل إبراهيم إسماعيل؟
ج: معرفش.
- س: وهل تتهمين المدعوة / دعاء ناصر محمود مهران بثمة اتهام؟
ج: معرفش.
- س: وما هو قصد المتهمة دعاء ناصر محمود مهران؟
ج: معرفش.
- س: هل من علاقة أو خلافات بينك وبين المشكو في حقها؟
ج: مفيش بيني وبينها حاجة غير إنها مرات خالي السيد.
- س: هل لديك أقوال أخرى؟
ج: لأ. تمت أقوالها وتوقع منها
